الفقرة( 12 )من  حوارات منكوب و منهوب ..

الفقرة( 12 )من حوارات منكوب و منهوب ..

عمران كيالي 

منكوب : إمبارح يا أبو الشباب، بعد ما دفعت فواتير المي، قلت لحالي أشتري نص كيلو تفاح قبل ما أروح ع البيت ..

منهوب : بس من زمان ما في مي !..

منكوب : صح ما في مي، بس في فواتير لازم تدفعا مع غرامات التأخير و رسم إعادة العداد ..

منهوب : ليش شالو العداد ؟..

منكوب : لا ما شالوه، بس هيك الأصول، بياخدو رسم رفع العداد و رسم إعادته، المهم، ما إلك بالطويلة، و أنا بالطريق ضربني القناص و إجت الرصاصة بنص راسي و قتلتني بأرضي ..

منهوب : وخ وخ وخ .. إي و بعدين ؟..

منكوب : بعدين شفت حالي ع طريق الرقة، و عند حاجز داعش صوب واحد من العناصر الرشيش و خرطني مشط جاب أجلي و ساح دمي بالأراضي ..

منهوب : وخ وخ وخ .. إي و بعدين ؟..

منكوب : بعدين كملت طريقي ، لاقيت حالي ع طريق الراموسة، سمعت صوت مرعب كتير كتير، أتاري هادا صاروخ روسي نزل مباشر علي و صرت شقف شقف ..

منهوب : وخ وخ وخ .. إي و بعدين ؟..

منكوب : ما إلك بالطويلة، كملت طريقي، بس هالمرة طريق السعن، قام طلع لي ديب كبير قد الجحش، هجم علي، و بعد ما شلحني المصاري أكلني ..

منهوب : وخ وخ وخ .. إي و بعدين ؟..

منكوب : و بعدين إجا ناس ما بعرفن، و قالو هادا الزلمة مات أربع موتات ع الشرع، من حقو ندفنو مع الشهدا ..

منهوب : كويس، و بعدين ؟..

منكوب : ما إلك بالطويلة، الشباب أخدوني ع الجبانة، بس الحاجز الأخير منع الجنازة ..

منهوب : له له له .. طيب ليش ؟..

منكوب : قال إنو الشباب ما جابو موافقة من رئيس الفرع على الدفن في جبانة الشهدا ..

منهوب : إي .. و إش صار بعدين ؟..

منكوب : بعد المشاورات بين الشباب ، دفنوني قبل الحاجز الأخير على الباكيت يمين الطريق ، بكرا إذا بدك نلعب طاولة تعا لعندي هنيك ..

منهوب : إي الله يصلحا منكوبة خانم، شو خصرانة لو كان فيقتك من النوم قبل خمس دقايق ..

منكوب : لأ .. و فوقا بهدلتني ليش ما جبت تفاح !..

  • Social Links:

Leave a Reply